自家製酒樓菜之百花釀蟹鉗

材料方便先要準備急凍蟹鉗,市面上有很多包裝的日本蟹鉗,質素相當唔錯,我採用的就是以下圖片那種,價錢大概$120左右一大包。

除釀蟹鉗需要的另一樣材料一般人也會選擇蝦滑,我家皇上剛剛遇上對蝦敏感所以唯有改用墨魚滑!

只要將那些蝦滑包上蟹鉗,然後點蛋漿,再撲生粉,之後就可以攞去酥炸,記住炸嘅時候油溫必須是大火,切記攞起全部食物才可以熄火,否則食物就會返吸入油!由於每隻蟹鉗都不是太大面積:所以你可以選擇一個比較窄而高身嘅煲那就可以慳一點油了。

食嘅時候可以配一些甜酸醬或大紅切醋也十分適合。

鮑魚兩味 Abalone 1 Dish 2 Styles

鮑魚係香港人其中一樣至愛!

豐儉由人,唔使一定要食糖心鮑魚⋯⋯

新鮮鮑魚都可以煮得好好味!

今日我介紹嘅係,果皮蒸鮑魚同冰鎮醉鮑魚。

廚藝技巧難度:負1 (適合冇入廚經驗的人士)

1) 果皮蒸鮑魚基本上冇難度,先叫街市檔口洗乾淨鮑魚,最好嘅話係叫佢幫你將鮑魚同殼分離,方便你回家處理!

回家後將羗絲果皮絲有咁幼切咁又幼,備用。

將鮑魚放落碟,放上已準備好的羗絲及果皮絲,然後隔水蒸7分鐘,準備好豉油熟油淋上面,即成!

家庭觀眾呂生問究竟果皮使唔使浸水之後去衣呢?其實啲衣會有少少苦味,但係蒸野無需太在意但煲湯就一定要經過呢個程序!否則果皮唔靚、唔係正宗新會、成煲湯會苦晒!

2)醉鮑魚,首先用以上方法蒸熟鮑魚,無需放入豉油熟油,攤凍之後,把鮑魚肉及李錦記醉雞汁撈好後放入密實袋,四五個鐘頭之後可以切薄片,上碟!用來宴客一流!你還可以準備一些碎冰放在底部,更有睇頭。

洋蔥肉碎番茄醬螺絲粉

材料:

洋蔥大半個 (菜式的靈魂,不可缺少)

西班牙肉碎一Pack ($27.5)預先用鹽、糖、豉油,胡椒粉醃好

螺絲粉三分之一包 (購自759)

日式包裝鮮茄醬一包 (購至759)其他味道我也試過,唔係咁啱我口味,只係呢一款比較出色。

先把洋蔥切細粒,將洋蔥粒同肉碎一同起鑊炒。

放入滾水加入鹽同油,再放進螺絲粉一起煲。十分鐘後熄火,繼續用蓋,直至螺絲粉質地完全變林!的確需時!

把水倒出,然之後用已炒好的洋蔥芫荽粒加入番茄醬再加入螺絲粉撈好,煮一煮,即成。

如果想再開心一點,可以加上隻煎太陽蛋!

芋蓉帶子 Scallop on Smash Taro

芋頭半個 $10

日本帶子10隻 (無須用刺身級別)如果想慳錢可一開二,以下相片是一開二之後的厚度!

先把芋頭切大片蒸到全熟,用筷子篤下佢琳琳地就可以上碟將佢壓成蓉,加入少許鹽及胡椒粉 ⋯搓成圓餅型加上少許生粉備用!

將一個個預先準備好的芋頭蓉放進平底鑊煎香,然後上碟。之後用牛油煎香已解凍了的帶子,輕輕放上胡椒鹽,煎香了放上芋頭蓉上。最後可以放上燒汁或酸甜汁也可。

這個餸菜並不難做但程序較多,客人一定會感受到你呢份用心製作的手工菜!

冬菇草菇瑤柱花甲冬瓜粒湯

一聽依個湯就知有幾清甜。材料冬瓜一份$6 ,花甲半斤$30 ,北海道細粒瑤柱20粒$20 ,草菇$10

冬瓜及草菇切粒備用,瑤柱冬菇洗淨浸水。

將所有材料除了花甲放進湯煲,包括瑤柱水同冬菇水。煲大概1小時,然後將處理好的花甲放進再煲十五鐘。

花甲的處理方法

花甲由於有機會有泥會破壞成煲湯,所以準備是要額外小心,首先張花甲放在一個器皿內洗乾淨,然後用熱水倒進器皿令花甲半開口。細心看看每一隻開了口的花甲有沒有泥沙,如果發現有一兩隻有污泥就要把它掉走,其他就放進湯裏煲。

若不想麻煩也可以考慮放帶子及蝦仁代替花甲。

日本炊飯

三人份量材料

豬肉碎 (預先調味)

冬菇 (切🔪絲備用)

甘筍 (切粒備用)

日本珍珠米 (兩mug半)

蔥花 (飯熟後才灑上)

(代替煲飯的水)

亨氏雞湯

鰹魚汁 (呢個汁係重點不可缺少)可於759購買

冬菇水 (少量) 

老公話如果再加點紫菜碎在飯上更加有睇頭!

當然也可以選擇其他材料例如栗子及南瓜等。

呢個飯雖然可以用電飯煲煮,但用Le Creset 這種煲慢煮效果更佳。



🥣湯水篇三

節瓜紅衫魚豆腐湯

節瓜一小條 $5

紅衫魚四小條 $35

豆腐 $4

羗八片

先張魚洗乾淨再用紙巾印乾,煲定一大煲熱水,節瓜切條或粒備用。

燒紅鑊,下油放入羗片,再放紅衫魚,煎熟一邊,小心反轉,再加豆腐在另一邊煎,魚同豆腐煎好,撞入滾水,再加節瓜。

大火煲五分鍾轉中火煲十五分鐘,奶白色鮮甜魚湯即成!六碗水煲成兩至三碗。

如果俾老人家飲,可以用魚湯袋或用湯筲箕隔骨!

🥣湯水篇 一、二

這兩款湯又有益又夠味道,適合不喜歡淡味的人,例如有些人不喜愛飲清補涼…

選用西班牙豬展的原因是因為現在的本地豬肉也相當貴,而這種西班牙豬展又靚,價錢又合理,又出味。一包兩個,買定幾包擺喺屋企方便用來煲湯。

老黃瓜湯 (兩人份量)

細紅蘿蔔三條$9

老黃瓜一個 $20

蜜棗兩粒

扁豆赤小豆適量

西班牙豬展一個 $26

煲2-3小時

如果唔落肉可以考慮用腰果代替

粉葛湯 (兩人份量)

紅羅白兩至三條$9

粉葛半個 $20 (如果太大可以叫街市阿姐切一半先買)

扁豆赤小豆適量

西班牙豬展一個 $26 (相中是一 pack 兩個)